Ollu sajiin servodagas váilot hui ollu fágaolbmot sámi giella- ja kulturáddejumiin, ovdamearkka dihtii mánáidgárddiin, skuvllain, dearvvašvuođasuorggis ja politiijain. Danne lea dehálaš áŋgiruššansuorgi rekrutteret olbmuid geain lea gelbbolašvuohta sámegielas.

Njukčamánu 25. b. 2021 lágiduvvo Sámedikki digitála karriearakonferánsa Mii dárbbašit du! Konferánsa lea deaivvadanbáiki oahppoásahusaide, bargoaddiide ja sámi nuoraide.

Dáppe oainnusmahtto sámegielat gelbbolašvuođa dárbu. Oasálastit leat joatkkaskuvllaoahppit geain lea sámegiella vuosttaš- dahje nubbingiellan. Oahppit geat fitnet konferánssas besset diehtit sin áidnalunddot resursa birra, mii sis lea sámegielat gelbbolašvuođas, ja ožžot dieđuid iešguđege oahppo- ja karriearavejolašvuođaid birra.

Koronadili geažil čađahuvvo konferánsa digitálalaččat, vai sihke guossit ja veahkkebargit sáhttet searvat oadjebasat jođekeahttá. Konferánsii sáhttet searvat oahppit miehtá riikka. Konferánsa lágiduvvo ovttasbargguin Ta Utdanning-fitnodagain , mii jahkásaččat lágida oahppomeassuid miehtá riikka.

Konferánsa lágiduvvo njukčamánu 25. b. 2021 gaskal dii. 09:00 – 15:00, ja lea golmma oasis:

1. Ohppiid ráhkkanahttin. Dát dáhpáhuvvá ovdal lágideami, nu ahte ii geavahuvvo áigi dasa njukčamánu 25. b.  
2. Fásta prográmma váldolávddis.
3. Ohppiin vejolašvuohta oažžut dieđuid go háleštit čájáhusásaheddjiiguin.

Geahča prográmma dás

Oahppit ožžot dieđuid sisaloggema birra buori áiggis ovdal go konferánsa álgá nu ahte sáhttet registreret sin dieđuid ja oahpásnuvvat vuođđolávddiin. Skuvllaide sáddejuvvo dievaslaš geatnegahtton ráhkkananoahpahus maid oahppit galget čuovvut nu ahte leat bures ráhkkanan konferánsii.