Searvva čájeheaddjin Mii dárbbašit du! – vuosttaš digitála karriearakonferánsa sámi nuoraide
Ollu surggiin servodagas váilot fágaolbmot geain lea giella- ja kulturipmárdus, nu go ovdamearkka dihte mánáidgárddiin, skuvllain, dearvvašvuođasuorggis ja politiijas. Olbmuid rekruteren geain lea sámegielat gelbbolašvuohta alit ohppui lea danin dehálaš áŋgiruššansuorgi.
Njukčamánu 25.b.2021 lágida Sámediggi digitála karriearakonferánssa Mii dárbbašit du! Konferánsa lea deaivvadanbáiki sihke oahppoinstitušuvnnaide, bargoaddiide ja sámi nuoraide.
Dás boahtá sámegielat gelbbolašvuođa dárbu čalmmustahttojuvvot. Galledeaddjit leat oahppit joatkkaskuvllas geat ožžot oahpahusa sámegielas juogo vuosttaš- dahje nuppigiellan. Oahppit geat galledit konferánssa šaddet dihtomielalaččat das makkár earenoamáš resursa sis lea go sis lea sámegielgelbbolašvuohta, ja ožžot diehtojuohkima iešguđetlágan oahppo- ja karriearavejolašvuođain.
Koronadili dihte lágiduvvo konferánsa digitálalaččat, nu ahte sihke galledeaddjit ja oasseváldit oadjebasat sáhttet searvat almmá mátkkošteami haga. Konferánsa šaddá nappo olahanmuttus buot ohppiide miehtá riikka. Konferánsa lágiduvvo ovttasbarggus Ta utdanning:in, mii jahkásaččat lágida oahppomeassuid miehtá riikka.
Konferánsa lágiduvvo njukčamánu 25.b.2021, dii. 09:00 – 15:00, ja juhkkojuvvo golmma oassái:
- Ráhkkaneapmi ohppiide. Dát čađahuvvo ovdal lágideami, nu ahte dasa ii dárbbaš geavahit áiggi dán beaivve, njukčamánu 25.b.
- Fásta prográmma váldolávddis
- Vejolašvuođat ohppiide oažžut diehtojuohkima ja ságastallat čájeheddjiiguin.
Mii bovdet du organisašuvnna searvat čájeheaddjin dán konferánssas. Dáppe boađát deaivvadit oahppo- ja karriearagoikkus nuoraiguin miehtá sámi guovllu – it ge dárbbat mátkkoštit gosage.
Čájeheaddjin oaččut ovtta nuvttá standasaji mas leat čuovvovaččat mielde:
- Ovdanbuktinfilbma mii čájehuvvo buot gallededdjiide
- 1 miniwebinára mii bistá eanemusat 3 minuhta
- 1 linnjá chat:i
- 1 linnjá videoságastallamii
- Vejolašvuohta live-neahttarávdnjemii
- Vuođđodieđut ja vejolašvuođat ovddidit gitta viđá dábáleamos gažaldaga ja vástádusaid.
- Liŋkkat siidduide maid sáhttet viežžat dihtorii (omd pdf-gihppagat dahje katalogat).
- Vejolašvuohta registreret berošteddjiid oktavuođadieđuid standas.
- Buot sisdoallu digitála meassus, earret dat mii sáddejuvvo njuolggosáddagis, leat geahččanmuttus online gitta ohcanáigemearrái.
Dasa lassin lea vejolaš oastit liige sisdoalu standii, nu go kanálaid, eanet webináraid ja eanet linnjáid chatii ja videoságastallamiidda.
Leat go dus gažaldagat dahje háliidat eanet dieđuid?
Váldde áinnas oktavuođa info@tautdanning.no
